ഏവര്‍ക്കും ഐശ്വര്യത്തിന്റേയും സമൃദ്ധിയുടേയും പൊന്നോണാശംസകള്‍
Monday, August 31, 2009
വിശ്വാസം ജീവനേക്കാള്‍ വിലപ്പെട്ട ദൈവദാനം: ഡോ. ഡാനിയേല്‍ അച്ചാരുപറമ്പില്‍
വിശ്വാസം ജീവനേക്കാള്‍ വിലപ്പെട്ട ദൈവദാനമാണെന്ന്‌ വരാപ്പുഴ അതിരൂപത ആര്‍ച്ച്ബിഷപ്‌ ഡോ. ഡാനിയേല്‍ അച്ചാരുപറമ്പില്‍. വരാപ്പുഴ അതിരൂപത ഫാമിലി അപ്പോസ്തലേറ്റ്‌ എറണാകുളം ആശിര്‍ഭവനില്‍ സംഘടിപ്പിച്ച കുടുംബയൂണിറ്റ്‌ നേതൃസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വളരുന്ന തലമുറയുടെ വിശ്വാസരാഹിത്യം നമ്മെ അസ്വസ്ഥരാക്കുന്നു. നമുക്ക്‌ ചുറ്റും നടക്കുന്നത്‌ സഭയുടെ കാഴ്ചപ്പാടുകള്‍ക്ക്‌ വിരുദ്ധമാണെന്നും അദ്ദേഹം പറഞ്ഞു. ഫാമിലി അപ്പോസ്തലേറ്റ്‌ ഡയറക്ക്ടര്‍ ഫാ. ജോണ്‍ പുളിപ്പറമ്പില്‍ യോഗത്തില്‍ അധ്യക്ഷനായിരുന്നു. ഫാ.സേവ്യര്‍ കുടിയാംശേരി, പ്രഫ.വി.എക്സ്‌ സെബാസ്റ്റ്യന്‍, പ്രഫ.പ്രിമൂസ്‌ പെരിഞ്ചേരി, ജോബി തോമസ്‌, സിസ്റ്റര്‍ ലീന മേരി, ബാബു കോമരത്ത്‌, എഡ്വേര്‍ഡ്‌ എന്നിവര്‍ പ്രസംഗിച്ചു.
Friday, August 28, 2009
വെല്ലുവിളികളില്‍ ജാഗ്രത പുലര്‍ത്തുക : അല്‍മായ കമ്മീഷന്‍
ക്രൈസ്തവ വിശ്വാസത്തെയും സഭാസംവിധാനങ്ങളെയും ലക്ഷ്യമാക്കി ചില കേന്ദ്രങ്ങള്‍ ഉയര്‍ത്തുന്ന വെല്ലുവിളികള്‍ക്കും അവഹേളനങ്ങള്‍ക്കുമെതിരേ ജാഗരൂകരാകാന്‍ സീറോ മലബാര്‍ സഭാ അല്‍മായ കമ്മീഷന്‍ ആഹ്വാനം ചെയ്തു. നേട്ടങ്ങള്‍ കൈവരിച്ചവര്‍ കടന്നുവന്ന വഴികളെക്കുറിച്ച്‌ അഭിമാനപൂര്‍വം സഭാ സമൂഹത്തില്‍ വിവരിച്ചാല്‍ മതേതരത്വം നഷ്ടപ്പെടുമെന്ന്‌ വ്യാഖ്യാനിക്കുന്നവരുടെ ജല്‍പനങ്ങള്‍ ലജ്ജാകരമാണ്‌. ഭരണഘടനയും മതേതരത്വവും അഭിമാനപൂര്‍വം ഉയര്‍ത്തിപ്പിടിക്കുന്ന ക്രൈസ്തവ സമൂഹം മതസൗഹാര്‍ദവും പരസ്പര സ്നേഹവും സമാധാനവും കാംക്ഷിക്കുന്നവരാണ്‌. ജാതിയും മതവും രാഷ്ട്രീയവും ഭാഷയും നോക്കാതെ ക്രൈസ്തവസഭയുടെ നിസ്വാര്‍ഥ സേവന പ്രവര്‍ത്തന മേഖലകളെ ലോകം മുഴുവനും അംഗീകരിക്കുകയും ആദരിക്കുകയും ചെയ്യുമ്പോള്‍ സമൂഹത്തില്‍ വിഭാഗീയത സൃഷ്ടിച്ച്‌ നേട്ടങ്ങള്‍ കൊയ്യാനാണ്‌ ചില കേന്ദ്രങ്ങള്‍ ശ്രമിക്കുന്നത്‌. ക്രൈസ്തവ സഭയെക്കുറിച്ചു പഠനമോ അറിവോ ഇല്ലാത്തവരുടെ ആക്ഷേപങ്ങള്‍ അല്‍മായ സമൂഹം മുഖവിലയ്ക്കെടുക്കേണ്ടതില്ലെന്ന്‌ അല്‍മായ കമ്മീഷന്‍ സെക്രട്ടറി അഡ്വ.വി.സി സെബാസ്റ്റ്യന്‍ പ്രസ്താവനയില്‍ ചൂണ്ടിക്കാട്ടി.
Wednesday, August 26, 2009
സ്വാശ്രയ പ്രശ്നം : ജുഡീഷ്യല്‍ അന്വേഷണം വേണമെന്ന്‌ സിഎല്‍സി
സര്‍ക്കാരുമായി കരാറിലേര്‍പ്പെട്ട സ്വാശ്രയ പ്രഫഷണല്‍ കോളജുകളിലെ കോഴയുമായി ബന്ധപ്പെട്ട വെളിപ്പെടുത്തലുകള്‍ തള്ളിക്കളയരുതെന്ന്‌ സിഎല്‍സി സംസ്ഥാന സെക്രട്ടറിയേറ്റ്‌ പത്രക്കുറുപ്പില്‍ ആവശ്യപ്പെട്ടു. സുതാര്യമായ വ്യവസ്ഥകളോടെ അഡ്മിഷന്‍ നടത്തുന്ന ഇന്റര്‍ചര്‍ച്ച്‌ കൗണ്‍സിലിലെ സ്ഥാപനങ്ങളിലെ കുറ്റപ്പെടുത്തിയവര്‍ സമൂഹത്തോട്‌ പരസ്യമായി മാപ്പു പറയണമെന്നും സിഎല്‍സി ആവശ്യപ്പെട്ടു. യോഗത്തില്‍ സംസ്ഥാന പ്രസിഡന്റ്‌ സണ്ണി പൗലോസ്‌ അധ്യക്ഷനായിരുന്നു. ഫാ.ജോസ്‌ വയലിക്കോടത്ത്‌, ഡെന്നീസ്‌ കെ.ആന്റണി, റിജു കാഞ്ഞൂക്കാരന്‍, സിസ്റ്റര്‍ ജ്യോതിസ്‌, സി.ഡി ജോസ്‌ ചക്യേത്ത്‌, എ.ഡി ഷാജു എന്നിവര്‍ പ്രസംഗിച്ചു.
Tuesday, August 25, 2009
വിദ്യാഭ്യാസ പുരോഗതിയില്‍ സ്വകാര്യമേഖലയുടെ പങ്ക്‌ വലുത്‌ : ഉമ്മന്‍ചാണ്ടി
സ്വകാര്യമേഖലയുടെ ശക്തമായ ഇടപെടലും സാന്നിധ്യവുമാണ്‌ കേരളത്തിന്റെ വിദ്യാഭ്യാസ വളര്‍ച്ചയ്ക്ക്‌ അടിത്തറയെന്ന്‌ പ്രതിപക്ഷ നേതാവ്‌ ഉമ്മന്‍ചാണ്ടി. അസമ്പ്ഷന്‍ കോളജ്‌ വജ്രജൂബിലി ആഘോഷങ്ങള്‍ ഉദ്ഘാടനം ചെയ്യുകയായിരുന്നു അദ്ദേഹം.ഉന്നത വിദ്യാഭ്യാസരംഗത്ത്‌ കേരളം വെല്ലുവിളികള്‍ നേരിടുകയാണ്‌. ഉന്നത വിദ്യാഭ്യാസരംഗത്ത്‌ നിലനില്‍ക്കുന്ന പ്രശ്നങ്ങള്‍ പരിഹരിക്കാന്‍ കൂട്ടായ പരിശ്രമം നടത്തിയില്ലെങ്കില്‍ വലിയ തിരിച്ചടികള്‍ നേരിടേണ്ടിവരും. കേരളത്തില്‍ എല്ലാവരും പ്രാഥമിക വിദ്യാഭ്യാസം നേടുന്നതിനാല്‍ പാര്‍ലമെന്റ്‌ പാസാക്കിയ വിദ്യാഭ്യാസ അവകാശനിയമത്തിന്‌ കേരളത്തില്‍ പ്രസക്തി കുറവാണെന്നും ഉമ്മന്‍ചാണ്ടി കൂട്ടിച്ചേര്‍ത്തു.കഴിഞ്ഞ അറുപതു വര്‍ഷങ്ങളായി വിദ്യാഭ്യാസരംഗത്ത്‌ അസമ്പ്ഷന്‍ കോളജ്‌ അഭിമാനിക്കാവുന്ന ചരിത്രനേട്ടങ്ങളാണ്‌ സമ്മാനിച്ചിട്ടുള്ളതെന്നും ഉമ്മന്‍ചാണ്ടി അഭിപ്രായപ്പെട്ടു. സ്റ്റുഡന്റ്സ്‌ അമിനിറ്റി സെന്ററിന്റെ ശിലാസ്ഥാപനവും അദ്ദേഹം നിര്‍വഹിച്ചു.ആര്‍ച്ച്ബിഷപ്‌ മാര്‍ ജോസഫ്‌ പവ്വത്തില്‍ മുഖ്യപ്രഭാഷണം നടത്തി. ക്രൈസ്തവസഭ വനിതാ വിദ്യാഭ്യാസത്തിന്‌ എന്നും പ്രാധാന്യം നല്‍കിയിരുന്നു. അതിന്റെ തുടര്‍ച്ചയായാണ്‌ ചങ്ങനാശേരി രൂപതയുടെ ബിഷപ്പായിരുന്ന മാര്‍ ജയിംസ്‌ കാളാശേരി അസമ്പ്ഷന്‍ കോളജിനു തുടക്കമിട്ടത്‌.സാങ്കേതിക വിദ്യാഭ്യാസവും സ്വാതന്ത്ര്യവും സമൂഹത്തിന്റെ നന്മയ്ക്കുവേണ്ടി വിനിയോഗിക്കാന്‍ ഉപകരിക്കണമെന്നും ആര്‍ച്ച്ബിഷപ്‌ മാര്‍ പവ്വത്തില്‍ കൂട്ടിച്ചേര്‍ത്തു.
Subscribe to:
Posts (Atom)
