വിശ്വാസികള്‍ വചനത്തില്‍ വളരണം: മാര്‍ മാത്യു മൂലക്കാട്ട്‌

വിശ്വാസികള്‍ വചനത്തില്‍ വളരണമെന്ന്‌ ആര്‍ച്ചു ബിഷപ്‌ മാര്‍ മാത്യു മൂലക്കാട്ട്‌. ചെങ്ങളം ഇടവകയിലെ വചനവര്‍ഷ സമാപനത്തോടനുബന്ധിച്ചു നടത്തിയ ബൈബിള്‍ കണ്‍വന്‍ഷനില്‍ സമാപന സന്ദേശം നല്‍കുകയായിരുന്നു ആര്‍ച്ചു ബിഷപ്‌. വചനത്തില്‍ വളരുമ്പോള്‍ മുള്‍ച്ചെടികളാകുന്ന തിന്മയുടെ കളകള്‍ തഴച്ചു വളരാതിരിക്കാന്‍ ഏവരും ജാഗരൂഗരായിരിക്കണമെന്നും സഭയെയും സഭയുടെ ചിന്താഗതികളെയും തകര്‍ക്കുവാന്‍ തിന്മയുടെ ശക്തികള്‍ പല രൂപത്തിലും ഭാവത്തിലും പ്രവര്‍ത്തിക്കുന്നുണെ്ടന്നും ആര്‍ച്ചുബിഷപ്‌ കൂട്ടിച്ചേര്‍ത്തു.വചനവര്‍ഷ സമാപനത്തോടനുബന്ധിച്ചു നടത്തിയ ബൈബിള്‍ റാലിയില്‍ ആയിരക്കണക്കിന്‌ വിശ്വാസികള്‍ പ്രാര്‍ഥനാനിരതരായി പങ്കെടുത്തു. ഇടവകയിലെ എല്ലാ ഭവനങ്ങളിലും ബൈബിള്‍ പ്രതിഷ്ഠയും കൂട്ടായ്മകളില്‍ ബൈബിള്‍ ക്ലാസുകളും ഇതോടനുബന്ധിച്ചു നടത്തി. തെക്കേ കുരിശുപള്ളി, ആലുങ്കല്‍ തകിടി, മേടയ്ക്കല്‍, ചപ്പാത്തു കുരിശുപള്ളി എന്നിവിടങ്ങളില്‍ നിന്നുമാരംഭിച്ച റാലികള്‍ ചെങ്ങളം പള്ളി ജംഗ്ഷനില്‍ സമാപിച്ചു. വിവിധ മത്സരങ്ങളില്‍ വിജയികളായവര്‍ക്ക്‌ ആര്‍ച്ചു ബിഷപ്‌ മാര്‍ മാത്യു മൂലക്കാട്ട്‌ സമ്മാനങ്ങള്‍ നല്‍കി. വികാരി റവ. ഡോ. സേവ്യര്‍ കൊച്ചുപറമ്പില്‍, ഫാ. ജയിംസ്‌ കൊല്ലംപറമ്പില്‍ എന്നിവര്‍ പരിപാടികള്‍ക്കു നേതൃത്വം നല്‍കി.