മതമില്ലാത്ത ജീവനുകളെ സൃഷ്ടിക്കുന്നവര്‍ക്ക്‌ തിരിച്ചടി നല്‍കണം: മാര്‍ പവ്വത്തില്‍

മതമില്ലാത്ത ജീവന്‍ സൃഷ്ടിക്കുന്നതിനായി ബോധപൂര്‍വം ശ്രമിക്കുന്ന ശക്തികള്‍ക്ക്‌ തിരിച്ചടി നല്‍കേണ്ട സമയം അതിക്രമിച്ചിരിക്കുകയാണെന്ന്‌ മാര്‍ ജോസഫ്‌ പവ്വത്തില്‍. കടമനിട്ട സെന്റ്‌ ജോണ്‍സ്‌ കത്തോലിക്കാ പള്ളിയുടെ പ്ലാറ്റിനം ജൂബിലി സമാപനസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ദൈവനിഷേധം ബോധപൂര്‍വം മനുഷ്യമനസില്‍ കുത്തിനിറയ്ക്കാനാണ്‌ ചിലര്‍ ശ്രമിക്കുന്നത്‌. ധാര്‍മികത നഷ്ടപ്പെടുന്ന സമൂഹത്തില്‍ സത്യസന്ധത പുലര്‍ത്തേണ്ടത്‌ സമൂഹത്തിന്റെ ആവശ്യമാണെന്നും അദ്ദേഹം പറഞ്ഞു. സമൂഹത്തില്‍ നന്മയും, തിന്മയും തമ്മിലുള്ള പോരാട്ടമാണ്‌ നടക്കുന്നത്‌. ക്രൈസ്തവര്‍ നന്മയ്ക്കുവേണ്ടി പോരാടുന്ന പടയാളികളാണ്‌. മൂല്യച്യുതിക്കെതിരെ കടുത്ത നിലപാട്‌ സ്വീകരിക്കണം. ഉപഭോഗത്തോടുള്ള അത്യാര്‍ത്തി ധാര്‍മികത നഷ്ടപ്പെടുത്തുന്നതായും മാര്‍ പവ്വത്തില്‍ കൂട്ടിച്ചേര്‍ത്തു.വര്‍ധിച്ചുവരുന്ന നിഷേധാത്മകമായ സമീപനങ്ങള്‍ക്കെതിരെ പോരാടാന്‍ ദൈവസഹായം ആവശ്യമാണെന്ന്‌ ചടങ്ങില്‍ അധ്യക്ഷത വഹിച്ച ബസേലിയോസ്‌ ക്ലീമീസ്‌ കാതോലിക്കാ ബാവ പറഞ്ഞു. ദൈവീക മൂല്യങ്ങളെ എതിര്‍ക്കുന്നവരായാലും അവരെ തിരിച്ചറിയാന്‍ ഉള്ള ഇച്ഛാശക്തി നമുക്കുണ്ടാവണം. ദൈവത്തിന്റെ നിയോഗത്തിലേക്കു അതിര്‍ത്തികളില്ലെന്നും അദ്ദേഹം പറഞ്ഞു