സ്വയം സഹായ സംഘങ്ങള്‍ക്ക്‌ നാടിന്റെ ഭക്ഷ്യ സുരക്ഷയില്‍ നിര്‍ണായക പങ്ക്‌ : മാര്‍ ചക്യത്ത്‌

നാടിന്റെ ഭക്ഷ്യ സുരക്ഷയില്‍ സ്വയം സഹായ സംഘങ്ങള്‍ക്ക്‌ നിര്‍ണായക പങ്കാണുള്ളതെന്ന്‌ എറണാകുളം-അങ്കമാലി അതിരൂപതാ സഹായ മെത്രാന്‍ മാര്‍ തോമസ്‌ ചക്യത്ത്‌ അഭിപ്രായപ്പെട്ടു. അതിരൂപതാ വെല്‍ഫെയര്‍ സര്‍വീസസിന്റെ വാര്‍ഷിക ജനറല്‍ ബോഡി യോഗത്തില്‍ അധ്യക്ഷപ്രസംഗം നിര്‍വഹിക്കുകയായിരുന്നു അദ്ദേഹം. കാര്‍ഷിക രംഗത്ത്‌ സ്വയം സഹായ സംഘങ്ങള്‍ കൂടുതല്‍ ശ്രദ്ധ ചെലുത്തണമെന്നും അദ്ദേഹം പറഞ്ഞു. വെല്‍ഫയര്‍ സര്‍വീസസ്‌ എക്സിക്യൂട്ടീവ്‌ സെക്രട്ടറി ഫാ.പോള്‍ മൂഞ്ഞേലി വാര്‍ഷിക റിപ്പോര്‍ട്ട്‌ അവതരിപ്പിച്ചു. സര്‍വീസസിന്റെ മൈക്രോ ഫിനാന്‍സ്‌ വിഭാഗമായ വെസ്കോ ക്രെഡിറ്റിന്റെ അഞ്ച്‌ പുതിയ ബ്രാഞ്ചുകള്‍, ബയോ ഗ്യാസ്‌ പ്ലാന്റുകള്‍ക്കും സോളാര്‍ വാട്ടര്‍ ഹീറ്ററുകളള്‍ക്കും കാര്‍ബണ്‍ ക്രെഡിറ്റ്‌ സബ്സിഡി, നബാര്‍ഡിന്റെ സഹായത്തോടെയുള്ള വായ്പാ പദ്ധതി, കൗമാര പ്രായത്തിലുള്ള പെണ്‍കുട്ടികളുടെ വേദിയായ പ്രബോധിനി സംഘങ്ങള്‍, വിമന്‍ ലേസര്‍ സെല്‍, കയര്‍ ക്ലസ്റ്റര്‍ പദ്ധതി, ആഭരണ നിര്‍മാണ പരിശീലനം, ഭവന പുനരുദ്ധാരണ പദ്ധതി, കൗണ്‍സലിംഗ്‌ സെന്ററുകള്‍, നീര്‍ത്തട വികസന പദ്ധതി മുതലായവ വെല്‍ഫെയര്‍ സര്‍വീസസിന്റെ ഭാവി പ്രവര്‍ത്തനങ്ങളായി നടപ്പാക്കുമെന്ന്‌ ബിഷപ്‌ മാര്‍ തോമസ്‌ ചക്യത്ത്‌ വ്യക്തമാക്കി.