മലങ്കര കത്തോലിക്കാ സഭാ സൂനഹദോസ്‌ ആരംഭിച്ചു

മലങ്കര കത്തോലിക്കാസഭയുടെ എട്ടാമത്‌ എപ്പിസ്കോപ്പല്‍ സൂനഹദോസ്‌ ഇന്നലെ തിരുവനന്തപുരത്ത്‌ പട്ടം കാതോലിക്കേറ്റ്‌ സെന്ററില്‍ ആരംഭിച്ചു. മേജര്‍ ആര്‍ച്ച്‌ ബിഷപ്‌ മാര്‍ ബസേലിയോസ്‌ ക്ലീമിസ്‌ കാതോലിക്കാബാവയുടെ അധ്യക്ഷതയില്‍ ചേര്‍ന്ന സൂനഹദോസില്‍ ആര്‍ച്ച്‌ ബിഷപ്‌ തോമസ്‌ മാര്‍ കൂറിലോസ്‌, ബിഷപ്പുമാരായ ഗീവര്‍ഗീസ്‌ മാര്‍ ദിവന്നാസിയോസ്‌, യൂഹാനോന്‍ മാര്‍ ക്രിസോസ്റ്റം, ജോഷ്വാ മാര്‍ ഇഗ്നാത്തിയോസ്‌, ഏബ്രഹാം മാര്‍ യൂലിയോസ്‌, ഗീവര്‍ഗീസ്‌ മാര്‍ തിമോത്തിയോസ്‌, ജോസഫ്‌ മാര്‍ തോമസ്‌, ജേക്കബ്‌ മാര്‍ ബര്‍ണബാസ്‌ എന്നിവര്‍ പങ്കെടുക്കുന്നു. സഭയുടെ പ്രത്യേക നിയമങ്ങളുടെ ക്രോഡീകരണം, കാതോലിക്കേറ്റ്‌ സെന്ററിന്റെ നിര്‍മാണം, ആരാധനക്രമ പുസ്തകങ്ങളുടെ പരിഷ്കരണം, തുടങ്ങിയ വിഷയങ്ങള്‍ ചര്‍ച്ച ചെയ്യും. വ്യാഴാഴ്ച സമാപിക്കും.