ബിഷപ്‌ ജോഷ്വാ മാര്‍ ഇഗ്നാത്തിയോസ്‌ കെസിബിസി പ്രസിഡന്റ്‌

ആര്‍ച്ച്ബിഷപ്‌ ഡോ. ഡാനിയേല്‍ അച്ചാരുപറമ്പിലിന്റെ ദേഹവിയോഗത്തെത്തുടര്‍ന്ന്‌ കേരള കത്തോലിക്കാ മെത്രാന്‍ സമിതിയുടെ വൈസ്‌ പ്രസിഡന്റും മാവേലിക്കര മലങ്കര കത്തോലിക്കാ രൂപതയുടെ അധ്യക്ഷനുമായ ബിഷപ്‌ ജോഷ്വാ മാര്‍ ഇഗ്നാത്തിയോസ്‌ കെസിബിസി പ്രസിഡന്റായി ചുമതലയേറ്റു. കെസിബിസി പ്രസിഡന്റായി പ്രവര്‍ത്തിച്ചുവരുകയായിരുന്നു ആര്‍ച്ച്ബിഷപ്‌ ഡോ. ഡാനിയേല്‍ അച്ചാരുപറമ്പില്‍. 1950 മേയ്‌ 24-ന്‌ കൊട്ടാരക്കരയില്‍ ജനിച്ച ബിഷപ്‌ ജോഷ്വാ മാര്‍ ഇഗ്നാത്തിയോസ്്‌ 1978 ഏപ്രില്‍ 20-ന്‌ പൗരോഹിത്യം സ്വീകരിച്ചു. ദീര്‍ഘകാലം ചെന്നൈ സെന്റ്‌ തോമസ്‌ മലങ്കര കത്തോലിക്കാ ദൈവാലയത്തിന്റെ വികാരിയായി സേവനം അനുഷ്ഠിച്ച അദ്ദേഹം 1998 ഏപ്രില്‍ 15-ന്‌ തിരുവനന്തപുരം മലങ്കര കത്തോലിക്കാ അതിരൂപതയുടെ സഹായമെത്രാനായി. 2001-2005 മുതല്‍ കെസിബിസി സെക്രട്ടറി ജനറലായി സേവനം അനുഷ്ഠിച്ച അദ്ദേഹം കെസിബിസി മദ്യവിരുദ്ധസമിതി ചെയര്‍മാന്‍, കെസിബിസി ലേബര്‍ കമ്മീഷന്‍ ചെയര്‍മാന്‍, സിബിസിഐ ലേബര്‍ കമ്മീഷന്‍ ചെയര്‍മാന്‍ എന്നീ നിലകളില്‍ സേവനം അനുഷ്ഠിച്ചിട്ടുണ്ട്‌. 2007 ഫെബ്രുവരി 16-ന്‌ മാവേലിക്കര രൂപതയുടെ മെത്രാനായി നിയമിതനായി. 2007 മുതല്‍ കെസിബിസി വൈസ്‌ പ്രസിഡന്റാണ്‌.