ബൈബിള്‍ പഠനം മാര്‍ഗദര്‍ശനമാകണം: മാര്‍ ജോര്‍ജ്‌ പുന്നക്കോട്ടില്‍

ബൈബിള്‍ പഠനം ജീവിതത്തില്‍ മാര്‍ഗദര്‍ശനമാകണമെന്ന്‌ ബിഷപ്‌ മാര്‍ ജോര്‍ജ്‌ പുന്നക്കോട്ടില്‍. കെസിബിസി ബൈബിള്‍ കമ്മീഷന്റെ ആഭിമുഖ്യത്തില്‍ സംഘടിപ്പിക്കുന്ന ലോഗോസ്‌ ക്വിസ്‌ 2009 ന്റെ സംസ്ഥാനതല സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. പിഒസി യില്‍ നടന്ന മത്സരപരീക്ഷയുടെ സമാപനത്തില്‍ വിജയികള്‍ക്കുള്ള സമ്മാനദാനം ബിഷപ്പ്‌ നിര്‍വഹിച്ചു. ഏറ്റവും കൂടുതല്‍ മാര്‍ക്ക്‌ നേടിയ ലോഗോസ്‌ പ്രതിഭ ആന്റണി ആന്‍ഡ്രൂസിന്‌ (കൊല്ലം രൂപത) പാലയ്ക്കല്‍ കുടുംബയോഗം ഏര്‍പ്പെടുത്തിയ തോമാ മല്‍പാന്‍ മെമ്മോറിയല്‍ കാഷ്‌ അവാര്‍ഡ്‌ 10,000 രൂപയും, രൂപതയ്ക്ക്‌ എവര്‍ റോളിംഗ്‌ ട്രോഫിയും നല്‍കി. പരീക്ഷയില്‍ ഏറ്റവും കൂടുതല്‍ അംഗങ്ങളെ ചേര്‍ത്ത ആദ്യ രണ്ട്‌ രൂപതകള്‍ക്ക്‌ കാഷ്‌ അവാര്‍ഡും ട്രോഫിയും നല്‍കി. എറണാകുളം -അങ്കമാലി അതിരൂപതയ്ക്ക്‌ വേണ്ടി ബൈബിള്‍ അപ്പോസ്തലേറ്റ്‌ ഡയറക്ടര്‍ ഡോ. ജിമ്മി പൂച്ചക്കാട്ടും, തൃശൂര്‍ രൂപതയ്ക്ക്‌ വേണ്ടി ഫാ.ലിജോ ചിറ്റിലപ്പള്ളിയുമാണ്‌ അവാര്‍ഡ്‌ ഏറ്റുവാങ്ങിയത്‌. ഇടവക തലത്തില്‍ ഏറ്റവും കൂടുതല്‍ അംഗങ്ങളെ ചേര്‍ത്ത്‌ യഥാക്രമം ഒന്നും, രണ്ടും, മൂന്നും സ്ഥാനങ്ങള്‍ നേടിയ അങ്കമാലി സെന്റ്‌ ജോര്‍ജ്‌ ബസലിക്കയ്ക്ക്‌ വേണ്ടി റെക്ടര്‍ ഫാ.ജോസഫ്‌ കല്ലറക്കലും, പാവര്‍ട്ടി സെന്റ്‌ ജോസഫസ്‌ പള്ളിക്കുവേണ്ടി ഫാ.ലിജോയും, ഇരട്ടയാര്‍ സെന്റ്‌ തോമസ്‌ ഫൊറോന പള്ളിക്കുവേണ്ടി വികാരി ഫാ.ജോസ്‌ കോട്ടൂരും അവാര്‍ഡ്‌ ഏറ്റുവാങ്ങി.