ജനസംഖ്യാനുപാതികമായ പ്രാതിനിധ്യം ലഭ്യമാക്കണം: ഡോ. അച്ചാരുപറമ്പില്‍

ലത്തീന്‍ കത്തോലിക്കര്‍ക്ക്‌ ജനസംഖ്യാനുപാതികമായ പ്രാതിനിധ്യം എല്ലാ മേഖലയിലും ലഭ്യമാക്കണമെന്നു കെസിബിസി- കെആര്‍എല്‍സിസി പ്രസിഡന്റ്‌ വരാപ്പുഴ ആര്‍ച്ച്‌ ബിഷപ്‌ ഡോ.ഡാനിയേല്‍ അച്ചാരുപറമ്പില്‍. എറണാകുളം ആശീര്‍ഭവനില്‍ അന്നലെ ആരംഭിച്ച ലത്തീന്‍ സമുദായ അപെക്സ്‌ ബോഡിയായ കെആര്‍എല്‍സിസിയുടെ 13-ാ‍ം ജനറല്‍ ബോഡി യോഗത്തില്‍ അധ്യക്ഷത വഹിക്കുകയായിരുന്നു അദ്ദേഹം.സമുദായം എല്ലാ തലങ്ങളില്‍ അവഗണിക്കപ്പെടുകയാണ്‌. രാഷ്ട്രീയ-സാമൂഹ്യ-വിദ്യാഭ്യാസമേഖലകളിലും അധികാരത്തില്‍ നിന്നുമുള്‍പ്പെടെ സമുദായത്തെ അകറ്റി നിര്‍ത്തുന്ന സമീപനമാണ്‌ കാണുന്നത്‌. സമുദായം വൈവിധ്യമുള്ളതാണ്‌. അതിനാല്‍ തന്നെ സമുദായത്തിന്റെ പൊതുവായ ആവശ്യങ്ങള്‍ നേടിയെടുക്കുന്നതിന്‌ വ്യക്തിപരമായ താത്പര്യങ്ങള്‍ പോലും ത്യജിച്ചു കൊണ്ട്‌ ഐക്യത്തോടെ മുന്നോട്ടു പോകണം- ഡോ.അച്ചാരുപറമ്പില്‍ അപെക്സ്‌ ബോഡിയംഗങ്ങളോട്‌ വ്യക്ത മാക്കി.വിശ്വാസങ്ങളെയും ക്രൈസ്തവ സമൂഹം പരിപാവനമായി കരുതുന്നവയെയും അവഹേളിക്കാനുള്ള ശ്രമമാണു കേരളത്തില്‍ നടക്കുന്നതെന്നു ജനറല്‍ ബോഡി ഉദ്ഘാടനം ചെയ്തുകൊണ്ട്‌ സംസ്ഥാന മനുഷ്യാവകാശ കമ്മീഷനംഗം പ്രഫ.എസ്‌.വര്‍ഗീസ്‌ പറഞ്ഞു. ന്യൂനപക്ഷാവകാശം സമൂഹത്തിന്റെ അവകാശമാണ്‌. ഭരിക്കുന്നവന്റെ ഔദാര്യമല്ലെന്ന്‌ ഭരണാധികാരികള്‍ മനസിലാക്കണം- അദ്ദേഹം ചൂണ്ടിക്കാട്ടി. ക്രൈസ്തവ സഭയേയും സമുദായത്തേയും അവഹേളിക്കുന്ന നിയമപരിഷ്കരണ നിര്‍ദേശങ്ങള്‍ പിന്‍വലിക്കാന്‍ ജസ്റ്റീസ്‌ കൃഷ്ണയ്യര്‍ തയാറാകണമെന്നും അദ്ദേഹം ആവശ്യപ്പെട്ടു.