സഭയില്‍നിന്നു പുറത്തു പോയവര്‍ തിരിച്ചു വരണം: മാര്‍ തോമസ്‌ ചക്യത്ത്‌

തെറ്റായ വിശ്വാസത്തിന്റെ പേരില്‍ സഭയില്‍നിന്നും വിട്ടുപോയവര്‍ തിരിച്ചുവരുന്ന കൃപക്കായി പ്രാര്‍ഥിക്കണമെന്നു കെസിബിസി കരിസ്മാറ്റിക്‌ കമ്മീഷന്‍ ചെയര്‍മാനും, എറണാകുളം അങ്കമാലി അതിരൂപത സഹായമെത്രാനുമായ മാര്‍ തോമസ്‌ ചക്യത്ത്‌ ആഹ്വാനം ചെയ്തു. കേരള കത്തോലിക്ക കരിസ്മാറ്റിക്‌ കണ്‍വന്‍ഷനില്‍ ദിവ്യബലി അര്‍പ്പിച്ചു സംസാരിക്കുകയായിരുന്നു അദ്ദേഹം. ധൂര്‍ത്തു പുത്രന്‍ തിരിച്ചുവന്നതുപോലെ സഭയില്‍ നിന്നും വിട്ടുപോയവര്‍ മാനസാന്തരപ്പെട്ടു തിരികെ വരണം. ഒരാട്ടിന്‍കൂട്ടവും, ഒരിടയനുമാകണം. എന്നാലെ സഭക്ക്‌ ശക്തിയുണ്ടാകു. ഭിന്നിച്ചു നില്‍ക്കുമ്പോഴാണ്‌ സഭക്ക്‌ നേരെ ചിലര്‍ പീഡനങ്ങള്‍ അഴിച്ചു വിടുന്നതെന്നോര്‍ക്കണം. അദ്ദേഹം പറഞ്ഞു. ഫാ. അലക്സ്‌ താരമംഗലവും, സിസ്റ്റര്‍ എല്‍സിസ്‌ മാത്യുവും ക്ലാസുകള്‍ നയിച്ചു. ആരാധനക്ക്‌ ഐഎംഎസ്‌ ധ്യനഭവന്‍ ഡയറക്ടര്‍ ഫാ. പ്രശാന്ത്‌ നേതൃത്വം നല്‍കി.