എകെസിസി അവാര്‍ഡുകള്‍ പ്രഖ്യാപിച്ചു

എകെസിസി, ചെറുപുഷ്പ മിഷന്‍ലീഗ്‌ സ്ഥാപകന്‍ പി.സി ഏബ്രഹാം പല്ലാട്ടുകുന്നേലി(കുഞ്ഞേട്ടന്‍)ന്റെ പേരില്‍ ഏര്‍പ്പെടുത്തിയ നൂറ്റാണ്ടിന്റെ അല്‍മായ പ്രേഷിതന്‍ അവാര്‍ഡ്‌ അല്‍മായ പ്രേഷിതരംഗത്ത്‌ മികച്ച സംഭാവനകള്‍ നല്‍കുന്ന ബ്രദര്‍ ബെന്നി പുന്നത്തറ (ശാലോം ടിവി)യ്ക്ക്‌ നല്‍കും. സിറിയക്‌ കണ്ടത്തില്‍ അവാര്‍ഡ്‌ അഭിനയരംഗത്ത്‌ മികച്ച പ്രകടനം കാഴ്ചവച്ച പ്രസിദ്ധ സിനിമാനടന്‍ ജോസ്‌ പ്രകാശിനാണ്‌. ഡൊമിനിക്‌ മണ്ണിപ്പറമ്പില്‍ ‘ദീനബന്ധു അവാര്‍ഡ്‌’ സ്വന്തം വൃക്ക ഒരു അന്യമതസ്ഥന്‌ ദാനം ചെയ്ത ഫാ. ഡേവിസ്‌ ചിറമ്മലിനും നല്‍കും.സാമൂഹ്യസേവന അവാര്‍ഡിന്‌ നവജീവന്‍ ട്രസ്റ്റ്‌ രക്ഷാധികാരി പി.യു തോമസും എം.എം മാത്യു മടുക്കക്കുഴി മെമ്മോറിയല്‍ സീനിയര്‍ പ്രവര്‍ത്തക അവാര്‍ഡിനു കെ.ജെ ചാക്കോ കുഴിവയലും അര്‍ഹരായി. ഒ.എം ജോണ്‍ ഓലിക്കല്‍ മതാധ്യാപക അവാര്‍ഡ്‌ 2008ലേത്‌ ആനക്കല്ല്‌ ഇടവകയില്‍ 70 വര്‍ഷത്തിനുമേല്‍ മതാധ്യാപനം നടത്തിവരുന്ന കുര്യാക്കോസ്‌ (കുട്ടിസാര്‍) മേപ്പലക്കാടിനും 2009ലെ അവാര്‍ഡ്‌ ബേബി ആലുങ്കലിനും (കൂത്താട്ടുകുളം) നല്‍കും. സാഹിത്യഅവാര്‍ഡ്‌ 2008 ലേത്‌ എ.കെ പുതുശേരിക്കും 2009 ലേത്‌ ടോം ജോസിനും (അങ്കമാലി) നല്‍കും. എറണാകുളത്തെ എകെസിസിയുടെ സ്ഥലം അന്യകൈവശത്തില്‍നിന്നു തിരിച്ചെടുക്കാന്‍ സഹായിച്ച ബേബി മാത്യുവിന്‌ സേവന അവാര്‍ഡും നല്‍കും. അഖിലകേരള കത്തോലിക്കാ കോണ്‍ഗ്രസ്‌ സംസ്ഥാന വര്‍ക്കിംഗ്‌ കമ്മിറ്റി മീറ്റിംഗില്‍ പ്രസിഡന്റ്‌ എം.ഡി ജോസഫ്‌ മണ്ണിപ്പറമ്പില്‍ അധ്യക്ഷത വഹിച്ചു. ഹൈറേഞ്ച്‌ കര്‍ഷക സമരത്തിന്‌ എല്ലാവിധ പിന്തുണ നല്‍കാനും മാര്‍ച്ച്‌ 12ന്‌ കട്ടപ്പനയില്‍ ഹൈറേഞ്ച്‌ സംരക്ഷണസമിതിയുടെ ആഭിമുഖ്യത്തില്‍ നടക്കുന്ന ഉപവാസ സത്യഗ്രഹത്തില്‍ കത്തോലിക്കാ കോണ്‍ഗ്രസ്‌ നേതാക്കള്‍ പങ്കെടുക്കാനും വര്‍ക്കിംഗ്‌ കമ്മിറ്റി തീരുമാനിച്ചു.