വിശ്വാസത്തിലും ധാര്‍മികതയിലും ഉറച്ചുനില്‍ക്കും: ഡോ. തോമസ്‌ മാര്‍ കൂറിലോസ്‌

വിശ്വാസത്തിലും ധാര്‍മികതയിലും കത്തോലിക്കാ സഭ ഉറച്ചുനില്‍ക്കുമെന്ന്‌ തിരുവല്ല അതിരൂപതാധ്യക്ഷന്‍ ഡോ. തോമസ്‌ മാര്‍ കൂറിലോസ്‌ മെത്രാപ്പോലീത്ത പറഞ്ഞു. രാമക്കല്‍മേട്‌ മലങ്കര കത്തോലിക്കാ ദേവാലയത്തിണ്റ്റെ സുവര്‍ണജൂബിലി ആഘോഷങ്ങള്‍ ഉദ്ഘാടനംചെയ്ത്‌ പ്രസംഗിക്കുകയായിരുന്നു അദ്ദേഹം. ആധുനിക കാലഘട്ടത്തില്‍ കത്തോലിക്കാസഭ ക്രൂശിക്കപ്പെടുകയാണ്‌. സഭയേയും സഭയുടെ നിലപാടുകളും വലിയതോതില്‍ വിമര്‍ശിക്കപ്പെടുകയാണ്‌. സഭയുടെ വിശ്വാസസത്യങ്ങളും ധാര്‍മികതയും ചോദ്യംചെയ്യുകയാണ്‌. വിമര്‍ശനങ്ങള്‍ക്ക്‌ മുന്നില്‍ തല കുനിക്കുകയോ മുട്ടുമടക്കുകയോ ചെയ്ത പാരമ്പര്യം കത്തോലിക്കാ സഭക്കില്ല. വിശ്വാസത്തിനുവേണ്ടി ജീവന്‍ നല്‍കിയ മുന്‍ഗാമികളുടെ പാതയിലൂടെയാണ്‌ സഭ സഞ്ചരിക്കുന്നതെന്നും അദ്ദേഹം വ്യക്തമാക്കി. കുമളി മേഖലാ വികാരി ഫാ. ഏബ്രഹാം തൈപ്പറമ്പില്‍ അധ്യക്ഷത വഹിച്ചു. വികാരി ഫാ. മത്തായി മണിപ്പറമ്പില്‍, ഫാ. ജോസഫ്‌ തടത്തില്‍, ഫാ. വര്‍ഗീസ്‌ പള്ളിക്കല്‍, ഫാ. മാത്യു കണ്ടത്തില്‍, ഗ്രാമപഞ്ചായത്തംഗം സി. രാജശേഖരന്‍, പി.ജെ. ജോസഫ്‌ പുത്തന്‍പുരക്കല്‍ എന്നിവര്‍ പ്രസംഗിച്ചു.