കോട്ടയം അതിരൂപതാ ശതാബ്ദി ആഘോഷങ്ങളുടെ ഭാഗമായി രൂപതയുടെ സ്ഥാപനദിനമായ ഇന്ന്‌ ഉച്ചകഴിഞ്ഞു 2.30നു കോട്ടയം ക്രിസ്തുരാജ കത്തീഡ്രലിൽ ശതാബ്ദി കൃതജ്ഞതാബലി അർപ്പിക്കും.
സീറോ മലബാർ സഭാ മേജർ ആർച്ച്ബിഷപ്‌ മാർ ജോർജ്ജ്‌ ആലഞ്ചേരിയുടെ മുഖ്യകാർമികത്വത്തിൽ അർപ്പിക്കപ്പെടുന്ന സമൂഹബലിയിൽ ഇന്ത്യയിലെ വത്തിക്കാൻ സ്ഥാനപതി ആർച്ച്ബിഷപ്‌ ഡോ. സാൽവത്തോറെ പെനാക്കിയോ വചനസന്ദേശം നൽകും. കോട്ടയം അതിരൂപതാധ്യക്ഷൻ മാർ മാത്യു മൂലക്കാട്ട്‌, അതിരൂപതയുടെ പ്രഥമ മെത്രാപ്പോലീത്ത മാർ കുര്യാക്കോസ്‌ കുന്നശേരി, നാഗ്പൂർ ആർച്ച്ബിഷപ്‌ ഡോ. ഏബ്രഹാം വിരുത്തക്കുളങ്ങര, മിയാവ്‌ ബിഷപ്‌ ഡോ. ജോർജ്ജ്‌ പള്ളിപ്പറമ്പിൽ, നിയുക്ത കോഹിമ ബിഷപ്‌ മോൺ.ജയിംസ്‌ ചരളേൽ, ബിഷപ്‌ മാർ ജോസഫ്‌ പണ്ടാരശേരിൽ, കത്തോലിക്കാസഭയിലെ മുപ്പതോളം മെത്രാന്മാർ, അതിരൂപതയിലെ വൈദികർ എന്നിവർ സഹകാർമികരായി പങ്കെടുക്കും. വികാരി ജനറാൾ മോൺ. മാത്യു ഇളപ്പാനിക്കൽ സ്വാഗതവും ശതാബ്ദി ആഘോഷ കമ്മിറ്റി ജോയിന്റ്‌ കൺവീനർ ഫാ. തോമസ്‌ കുരിശുംമൂട്ടിൽ നന്ദിയും പറയും.
